འཕན་པོ་རྒྱལ་ལུགས་ལྷས་ཀྱི་ལྷ་ཁང་ངམ་རྒྱལ་ལྷ་ཁང་།

ཡོངས་ཁུངས།   བོད་ལྗོངས་རླུང་འཕྲིན་དྲ་བ། རྩོམ་པོ།    སྤེལ་དུས།   2015-02-26
འཕན་པོ་རྒྱལ་ལུགས་ལྷས་ཀྱི་ལྷ་ཁང་ཞེས་པ་དེའི་བསྡུས་མིང་ལ་རྒྱལ་ལྷ་ཁང་ཞེས་འབོད་ཅིང་།  གྲོང་ཁྱེར་ལྷ་སའི་ལྷུན་གྲུབ་རྫོང་གི་རྭ་སྒྲེང་དགོན་པའི་ཉེ་འདབས་སུ་ཡོད།
འཕན་པོ་རྒྱལ་ལྷ་ཁང་ནི་བོད་ཀྱི་བསྟན་པ་ཕྱི་དར་སྐབས་བཞེངས་པའི་གནས་གཞི་ཆེ་གྲས་བཞིའི་ནང་གསེས་ཤིག་ཡིན་པ་དང་།  ལྷ་ཁང་དེ་ནི་བསྟན་པའི་མེ་རོ་སྨད་ནས་གསོ་མཁན་གྱི་གཙོ་གྲས་ཀླུ་མེས་ཀྱི་སློབ་མ་གྲགས་ཅན་བཞིའི་ཡ་གྱལ་ཞང་སྣ་ནམ་རྡོ་རྗེ་དབང་ཕྱུག་གིས་བོད་ཀྱི་རབ་བྱུང་མ་ཚུགས་གོང་དྲུག་ཅུ་སྐོར་དེའི་ཆུ་བྱི སྤྱི་ལོ ༡༠༡༢ ལོར་ཕྱག་བཏབ།  ཁོང་ནི་ཡབ་སྣ་ནམ་ཇོ་སྲས་དང་ཡུམ་ཞང་ལྕམ་སྒྲོལ་མའི་སྲས་སུ།  བོད་རབ་བྱུང་གོང་གི་ལོ་སྐོར་སྔ་མའི་མེ་ཕོ་བྱི་བ སྤྱི་ལོ ༩༧༥ ལོར་འཁྲུངས།  ལྕགས་བྱི སྤྱི་ལོ ༡༠༦༠ ལོར་རྒྱལ་ལྷ་ཁང་དུ་གཤེགས།  ཁོང་དགུང་ལོ་གསུམ་བཞེས་པའི་ས་སྟག སྤྱི་ལོ ༩༧༨ ལོར་འདུལ་བའི་བསྟན་པ་མདོ་སྨད་ཁམས་ནས་མེ་རོ་བླངས་དགུང་ལོ་བཅོ་བརྒྱད་བོད་ཆུ་མོ་སྦྲུལ སྤྱི་ལོ ༩༩༣ ལོར་ར་བ་ཟླུམ་པོ་ཞེས་པའི་གནས་སུ་ཀླུ་མེད་ཀྱི་དྲུང་ནས་རབ་ཏུ་བྱུང་།  དགུང་ལོ་སོ་བདུན་བོད་ཆུ་ཕོ་བྱི་བ སྤྱི་ལོ ༡༠༡༢ ལོར་འཕན་པོར་རྒྱལ་ལྷ་ཁང་བཏབ་ཅིང་།  དགོན་པ་དེའི་མཁན་རབས་དང་པོ་མཛད།  ལྷ་ཁང་རིམ་བཞིན་རྒྱ་ཆེར་བཏང་བ་དང་།  དགེ་འདུན་མང་དུ་འདུས།  ཁོང་གཤེགས་རྗེས་གདན་ས་སྐྱོང་མཁན་ཡོད་པ་དང་བར་སྟོངས་གཉིས་རེ་མོས་ཐེངས་མང་བྱས།  བོད་རབ་བྱུང་བཞི་པའི་ལྕགས་བྱི སྤྱི་ལོ ༡༢༤༠ ལོར་ཡོན་རྒྱལ་རབས་ཀྱིས་མངགས་པའི་བློན་པོ་དོར་རྟའི་དམག་བོད་དུ་འབྱོར་ནས་རྒྱལ་ལྷ་ཁང་མེར་བསྲེགས།  སེར་སྐྱ་ལྔ་བརྒྱ་ལྷག་བཀྲོངས།  དེ་རྗེས་ཧོར་དམག་དམག་དཔོན་དོར་རྟས་ཤིན་ཏུ་འགྱོད་ནས།  གསེར་དངུལ་སོགས་རིན་ཆེན་མང་པོ་བཏང་ནས་ལྷ་ཁང་ཉམས་གསོ་བྱས།  ལྷ་ཁང་འདིའི་འགྲམ་དུ་རྡོ་རིང་ཞིག་ཀྱང་ཡོད།  དེ་རྗེས་སླར་ཡང་གདན་རབས་ཉི་ཤུ་ཙམ་བསྐྱངས་བའི་མཁས་དབང་མང་དུ་བྱོན།  དེ་ལྟར་སྤྱི་ལོ ༡༩༥༣ ལོ་བར་མཁན་བརྒྱུད་གདན་རབས་བར་མི་ཆད་པ་བྱུང་།།
༼ རྩོམ་སྒྲིག་རྣམ་སྲས།༽
ལོགས་སུ་ཉར་བ།