སྟོད་གཞས་ཀྱི་བྱུང་བ་རགས་བསྡུས།

ཡོངས་ཁུངས།   བོད་ལྗོངས་རིག་གནས་དྲ་བ། རྩོམ་པོ།  བོད་ལྗོངས་འཕྲིན་དྲ། སྤེལ་དུས།  2015-12-11

སྟོད་གཞས།

སྟོད་གཞས་ནི་གཙོ་བོ་སྟོད་མངའ་རིས་རྒྱུད་ནས་དར་བའི་གཞས་དང་ཞབས་བྲོར་ངོས་འཛིན་པ་དང་དེ་ཡང་བོད་ཀྱི་དམངས་ཁྲོད་ཞབས་བྲོ་དང་རོལ་མོ་གཅིག་ཏུ་འདྲེས་པ་ཞིག་ཡིན་པས་དེར་སྟོད་ཁུལ་གྱི་དམངས་ཁྲོད་གླུ་གར་ཞིག་རེད་ཅེས་བཤད་ཆོག  སྟོད་གཞས་ཀྱི་ཐོག་མའི་ཉམས་འགྱུར་ནི་ཞབས་བྲོ་རྒྱག་སྐབས།  རྐང་པའི་འདེགས་འཇོག་ཆེ་ལ་ཤུགས་དང་ལྡན་ཏེ།  སྐྱེས་པ་རྣམས་ཀྱི་རྩ་བའི་སྟངས་སྟབས་ནི་གཞུ་མོ་བཀང་ནས་མདའ་མོ་འཕེན་པའི་བཟོ་ལྟ་དང་།  བུད་མེད་རྣམས་ཀྱི་རྩ་བའི་སྟངས་སྟབས་ནི་སྤུན་བཀལ་ནས་འཐག་ལས་བྱེད་པའི་བཟོ་ལྟ་བྱེད་པ་ཡིན།  འབྲེལ་ཡོད་ཡིག་རིགས་ཀྱི་ནང་དུ་གསལ་བར་གཞིགས་ན་སྟོད་གཞས་ནི་གླུ་གཞས་དང་ཞབས་བྲོ་ཟུང་དུ་འབྲེལ་བ་དང་རོལ་དབྱངས་གདངས་འགྱུར་སྙན་པས་ཕོ་མོ་གཞོན་དར་རྣམས་ཀྱིས་ཀྱང་སྟོད་གཞས་རྒྱག་རྒྱུར་དགའ་པོ་བྱེད་ཀྱི་ཡོད།  ཞབས་བྲོ་དེའི་རིགས་ལ་ལྷ་སའི་ཁུལ་དུ་སྒྲ་སྙན་ཞབས་བྲོའང་ཟེར།

སྟོད་གཞས་འདིར་ད་དུང་རྒྱག་ལུགས་ལྷོ་བྱང་གཉིས་སུ་དབྱེ་སྲོལ་ཡོད་པ་སྟེ་ལྷོ་ནི་སྟོད་ཀྱི་ལྷོ་རྒྱུད་དུ་གོ་ཞིང་གླུ་གར་དལ་ཅིང་ལྷོད་ལ་སྙན་འཇེབས་ལྡན་པ་དང་།  བྱང་ནི་སྟོད་བྱང་རྒྱུད་ལ་ངོས་འཛིན་གནང་བས་གླུ་གར་དཔའ་ཉམས་དང་ལྡན་ཞིང་བློ་གཤོགས་ཆེ་བ་ལ་བག་ཕེབས་པ་བཅས་ཡོད།  སྟོད་གཞས་ལྷ་སར་དར་ནས་དུས་ཚོད་གང་ཙམ་སོང་རྗེས་དེ་སྔ་དལ་གཞས་ཟེར་བ་དེར་རྒྱང་གཞས་དང་།  ཞབས་བྲོ་དང་སྦྲགས་ནས་མགྱོགས་གཞས་གཏོང་བ་དེར་འཁྲུག་གཞས་ཞེས་རིགས་གཉིས་སུ་དབྱེ་བ་ཡིན།  སྟོད་གཞས་དེ་དབུས་གཙང་ཁུལ་དུ་དར་ཁྱབ་བྱུང་རྗེས་སྟོད་གཞས་ཀྱི་སྒྲ་གདངས་འགྱུར་ཁུག་སོགས་ལ་དབུས་གཙང་གླུ་གར་གྱི་ཁྱད་ཆོས་དང་བསྟུན་པའི་འགྱུར་བ་གང་མཚམས་ཞིག་བྱུང་ཡོད།  གཞན་ཡང་མཁས་པ་འགའ་རེའི་གསུང་སྲོལ་ལྟར་ན་སྟོད་གཞས་ཞེས་པ་ནི་སྟོད་པ་ཕུལ་བའི་གཞས་ཀྱི་དོན་ལ་འཇུག་གསུངས་བའང་ཡོད།།

༼རྩོམ་སྒྲིག་ནོར་བུ།༽
ལོགས་སུ་ཉར་བ།  

དེ་མོ་ཡབ...

ཡེ་ཤེས་བ...