བོད་ཀྱི་རྩིག་བཟོ་རིག་པ་ལས་བོད་ཁང་གི་དམིགས་བསལ་ཁྱད་ཆོས་འགའ་ཞིག་གི་སྐོར།

ཡོངས་ཁུངས།   སྤང་རྒྱན་མེ་ཏོག་དུས་དེབ། རྩོམ་པོ།  བྱ་རིགས་པ་བློ་བཟང་རྣམ་རྒྱལ། སྤེལ་དུས།  2016-01-18

བོད་ཁང་གི་སྒོ་དང་སྒེའུ་ཁུང་གི་གཡས་གཡོན་དུ་ནག་རྩི་གཏོང་བ་དེ་ལ་འགའ་ཤས་ཀྱིས་བདུད་ཀྱི་སྨ་ར་མཚོན་བྱེད་རེད་ཟེར་བ་དང་ལ་ལས་དམ་ཅན་ཆོས་རྒྱལ་གྱི་རྭ་ཅོ་རེད་ཟེར་བ་སོགས་ཤོད་ཚུལ་མི་འདྲ་བ་མང་པོ་ཡོད་པ་ནི་ཁུངས་མེད་ཀྱི་གཏམ་དང་བྱིས་སྒྲུང་ལྟ་བུ་ཞིག་རེད།  དོན་དངོས་ནི་བོད་ལྗོངས་ས་བབས་མཐོ་བས་གནམ་གཤིས་གྲང་ངར་ཆེ་རུང་ཉི་འོད་ཕོག་ཚད་ཆེ་བའི་ཐོག་དགུན་དུས་ཉི་མ་ལྷོ་ཕྱོགས་སུ་བགྲོད་སྟབས་ལྷོ་ཕྱོགས་ནས་ཉི་འོད་ཕོག་ཤུགས་ཆེ་བས་ཁང་པ་ཕལ་ཆེར་ཁ་ལྷོ་བལྟ་བཟོ་སྲོལ་ཡོད།  ཚོས་གཞི་ནག་པོས་ཉི་འོད་འཐེན་པ་དང་དཀར་པོས་ཉི་འོད་བཀག་པ་དེང་དུས་ཀུན་གྱིས་ཁས་ལེན་གྱི་ཡོད།  བོད་ཁང་ཕལ་ཆེར་གྱི་ཕྱི་རྩིག་དཀར་པོ་བཟོ་སྲོལ་ལ་བརྟེན་དགུན་དུས་ཁང་པའི་ནང་ཉི་འོད་ཕོག་ནས་དྲོད་ཚད་འཐེན་ཤུགས་ཆེ་ཕྱིར་སྒེའུ་ཁུང་གི་མཐར་ནག་རྩི་གཏོང་བ་མ་ཟད།  ལྷོ་བལྟ་མིན་པའི་སྒོ་དང་སྒེའུ་ཁུང་ཡང་ནག་རྩི་བཏང་དོན་གི་ཚང་མ་གཞི་མཚུངས་ཀྱི་མཛེས་ཆ་ཡིན་པར་ཤེས།  ནག་པོས་ཉི་འོད་འཐེན་པ་དང་དཀར་པོས་ཉི་འོད་བཀག་པ་དེ་རང་རེའི་མེས་པོ་ཚོས་སྔར་ནས་ཤེས་ཀྱི་ཡོད་པ་མཚོན།

ཁང་པ་ས་ཕག་གི་རྩིག་པ་ཡིན་ན་ཕྱི་ངོས་སུ་ཞལ་བ་ངེས་པར་གཏོང་གི་ཡོད།  གང་ལ་ཞེ་ན་ཞལ་བའི་ངོས་སུ་མཛུབ་རིས་གཞུ་དབྱིབས་ཅན་རྩེག་པར་བྲིས་པའི་ཁར་མཛུབ་རིས་ཉིས་ཤུར་རེ་ཐད་ཀར་གཞུང་དུ་འཐེན་པ་ན་ཆར་ཆུ་རྩིག་ལྡེབས་སུ་ཕོག་སྐབས་ཞལ་བའི་མཛུབ་རིས་བརྒྱུད་ཆུ་རྣམ་ས་ཐོག་ཏུ་སོང་སྟབས་རྩིག་པར་སྲུང་སྐྱོབ་ཐུབ་ཀྱི་ཡོད།

སྤེན་བད།

སྤེན་བད་ནི་མཛེས་ཆ་ཙམ་མ་ཟད་ཁང་སྟེང་དུ་རླུང་བུའི་ཤུགས་ལེན་པའི་ཁྱད་ཆོས་དང་སྒྱོག་མདེལ་ལེན་པ།  འབར་གས་མི་བྱེད་པ་སོགས་ཀྱི་དགེ་མཚན་ལྡན་ཡོད།

ཀ་བ་བརྗེ་སྟངས་དང་འགྱོགས་རྒྱག་སྟངས།

བོད་ཁང་གི་ཁང་པའི་ཀ་བ་ཐང་པོ་མེད་པའི་རིགས་ལ་འདེགས་རོགས་ཀྱི་ཀ་བ་གསར་པ་བརྗེ་སྟངས་ནི་ཀ་བ་སྐྱོན་ཅན་དེའི་གཞུ་ཆུང་ལ་ཤིང་སྦོམ་ཕྲ་ཀ་བ་ལས་ཕྲ་ཙམ་གཉིས་བཙུགས་པའི་འོག་ཏུ་ཤིང་རིང་ཐུང་སྦོམ་ཕྲ་སྙོམས་པ་རེ་རེའི་རྩེ་མོ་ཀ་སྐྱོར་དེའི་འོག་ཏུ་བཅུག་ནས་རྩ་བ་གྱེན་དུ་སྐྱེར་བའི་སྟེང་ལ་བྱེ་མ་དོ་པོའམ་མི་གྲངས་མང་ཉུང་ཆ་སྙོམས་ཀྱིས་མནན་ཤིང་བཟོ་བ་དེའི་བཀོད་འདོམས་བཞིན་དལ་བུས་མནན་ཏེ་གདུང་མ་བཏེགས་རྗེས་ཀ་བ་རྙིང་པ་སྐྱོན་ཅན་དེ་ཚུར་བླངས།  དེ་ནས་ཀ་བ་གསར་པ་བཙུགས་ཏེ་འགྱོག་ཤིང་རིམ་བཞིན་གནོན་ཤུགས་ཇེ་ཡང་དུ་བཏང་ནས་ཀ་བ་ཚུགས་མཚམས་ཀ་སྐྱོར་དེ་ལེན་གྱི་ཡོད།  ཀ་བ་བརྗེ་བ་དེ་ཁང་ཐོག་གཅིག་ཙམ་མ་ཟད་ཐོག་བརྩེགས་ཁ་ཤས་ཡོད་པའི་འོག་ཁང་གི་ཀ་བ་ཡང་བརྗེ་སྲོལ་ཡོད།

༼རྩོམ་སྒྲིག་ནོར་བུ།༽
ལོགས་སུ་ཉར་བ།  

དེ་མོ་ཡབ...

ཡེ་ཤེས་བ...