སྐྱིད་ཟུར་ལགས་ཀྱི་གཏམ་རྒྱུད་ཁག་གཅིག༼སྨད་ཆ།༽

ཡོངས་ཁུངས།   བོད་ལྗོངས་འཕྲིན་དྲ། རྩོམ་པོ།  དམངས་ཁྲོད། སྤེལ་དུས།  2021-04-12

༡༽

སྙེ་མོ་སྦང་ཟན་ཆུ་ཤུར་རྐུན་མའི་གདོང་། །

འཕན་པོ་ཤིག་ཟན་དབུས་སྟོད་ལས་མ་དག །

དྭགས་ཀོང་ཀླ་ཀློའི་ཡུལ་དུ་བདག་མ་སྐྱེས། །

རྣམ་དཔྱོད་གཙང་པའི་ཞལ་དུ་མཆོད་པ་འབུལ། །

འདི་ནི་སྐྱིད་ཟུར་ལགས་སུ་བཀའ་བློན་རག་ཤག་གིས་ཇ་མཆོད་ཅིག་འབུལ་དགོས་ཞེས་གསུང་སྐབས་དེ་མ་ཐག་ཤོ་ལོ་ཀ་དེ་བརྩམས་པ་དང་།  ཚིག་དོན་དེ་དག་ཐོག་ནས་སྙེ་མོ་དང་།  འཕན་པོ།  དབུས་པ།  དྭགས་ཀོང་བཅས་ཀྱི་མི་རྣམས་ཧ་ཅང་འཕྱ་སྨོད་ཀྱི་ཚུལ་དུ་བྲིས་པ་ཞིག་ཡིན་ལ་སྐྱིད་ཟུར་རང་ཉིད་ཀྱི་སྐྱེས་ཡུལ་གཙང་པ་ཡིན་སྟབས།  དེར་འུད་བསྟོད་ཤུགས་ཆེན་བྱས་པ་ཞིག་རེད་ཅེས་ཟེར་སྲོལ་འདུག

 

༢༽ ཡུལ་གང་སྐྱིད་ནས་ཡོང་བའི་རྣལ་འབྱོར་པ་ཞིག་མི་ཚང་ཆེན་པོ་ཞིག་གི་སྒོ་འགྲམ་དུ་སླེབས་ནས་འདི་སྐད་དུ།

ཀྭ་ཡེ་ཚུར་ལ་གསོན་དང་སྦྱིན་བདག་མཁྱེན། །

ཁ་སྐོམ་གྲོད་པ་ལྟོགས་པའི་རྣལ་འབྱོར་ལ། །

ག་བྱས་བཀྲེས་སྐོམ་སེལ་བའི་སྦྱིན་པ་སྩོལ། །

ང་ཡིས་བསྔོ་བ་སྨོན་ལམ་གང་རྒྱས་ཞུ། །

ཞེས་བྱས་པས།  ཁྱི་ཚང་ཆེན་པོ་ཞིག་གི་ནང་ནས་ཁྱི་དོམ་འདྲ་བ་ཞིག་གིས།

ཅ་ཅོ་གང་དྲན་སྨྲ་བའི་རྣལ་འབྱོར་ཁྱེད། །

ཆ་ལུགས་ཆོས་དང་མཐུན་པ་མེད་པའི་ཁར། །

ཇ་ཆང་ཟས་ལ་འདོད་པ་ཆེ་བའི་སྐྱོན། །

ཉ་མོ་ལྕགས་ཀྱུས་འཛིན་ལྟར་ངས་ཁྱོད་འཛིན། །

ཞེས་བྱ་བ་ན།  རྣལ་འབྱོར་པས།

ཏ་ལའི་ཤིང་ལས་དཀྲུག་པའི་དབྱུག་པ་འདི། །

ཐ་མ་ཁྱི་འགྲམ་གཅོག་པའི་ལག་ཆ་ཡིན། །

ད་ལྟ་རང་ཚང་ནང་དུ་མ་འཛུལ་ན། །

ན་མེད་འཆི་འདུག་ཟེར་བ་ཐོས་ཡོང་ངོ་། །

ཞེས་བྱས་པས།  ཁྱི་ན་རེ།

དཔག་བསམ་ཤིང་ལས་དཀར་བའི་མཆེ་བ་འདི། །

ཕར་ཚུར་འགྲུལ་པའི་རྐང་པའི་ཆག་སྒོ་ཡིན། །

བ་ཤ་མི་ཡིས་ཟ་ལྟར་མི་འགོར་བའི། །

མ་འབོད་མགྲོན་ཁྱེད་ད་ལྟ་ཉིད་དུ་ཟ། །

ཞེས་བྱས་པས།  རྣལ་འབྱོར་པ་ན་རེ།

ཙ་རི་ལ་སོགས་དབེན་པའི་རི་ཁྲོད་དུ། །

ཚ་གྲང་དཀའ་སྤྱད་སྒོམ་བསྒྲུབས་བྱས་པའི་མི། །

ཛ་དྲག་ཁྱི་ངན་ཁྱོད་ལ་ང་མི་འཇིགས། །

ཝ་མོ་སྤྲང་པོས་གསོད་ལྟར་ངས་ཁྱོད་གསོད། །

ཅེས་མཆན་ཁུང་འོག་ནས་དབྱུག་པ་དེ་བཏོན་ནས་བསྣུན་པས།  ཁྱི་དེས་སྡུག་སྐད་ཀྱང་མི་འདོན་པར་ན་རེ།

ཞྭ་སེར་བླ་མ་ཡོད་ན་ད་སྒོམས་ཤིག །

ཟ་མ་ཞིམ་མངར་ཡོད་ཀྱང་ཟ་ལོང་མེད། །

འ་འུར་ཁ་ཆེམས་ཡོད་ཀྱང་འཇོག་ལོང་མེད། །

ཡ་མཚན་གྲུབ་རྟགས་མེད་པ་ཐག་གིས་ཆོད། །

ཅེས་ལྕགས་ཐག་སིང་སྒྲ་ངང་བཅད་དེ་མཆོངས་ནས་རྣལ་འབྱོར་པའི་གོས་ཀྱི་ཐུ་བ་ནས་འཛིན་པས།  དེ་འཕྲལ་གཞོན་ནུ་མ་མཛེས་ཤིང་ཡིད་དུ་འོང་བ་ཞིག་གིས་རྩམ་ཆང་ལག་ཏུ་ཁྱེར་ནས་འདི་སྐད་དོ།

ར་བ་གངས་སྐོར་ཞིང་མཆོག་ལྷ་ས་དེར། །

ལ་ཀླུང་བརྒལ་ནས་རྣལ་འབྱོར་ཆོས་ལ་ཕེབས། །

ཤ་ཟ་སྲིན་པོ་འདྲ་བའི་ཁྱི་ཁྱོད་ཀྱང་། །

ས་ཁུང་ཚང་གི་ནང་དུ་ད་ཉོལ་ཅིག །

ཧ་ཅང་ཆོས་ལ་དད་པ་ཆེ་བའི་མིར། །

ཨ་མས་བུ་ལྟར་བྱམས་བརྩེས་བསྐྱངས་ན་ལེགས། །

ཞེས་རྣལ་འབྱོར་པ་དང་ཁྱི་གཉིས་ཀྱི་དབར་ལ་བུ་མོས་བར་འདུམ་བྱས་པའོ།  འདི་ནི་བཀའ་བློན་རག་ཤག་བྱང་སྟག་ལུང་དུ་ཕེབས་སྐབས་སྐྱིད་ཟུར་ལགས་མཉམ་དུ་འཁྲིད་ཡོད་ཅིང་།  འཕན་པོ་ལྕང་ཤར་པའི་སྒོ་རྩར་ལྟོ་སློང་མཁན་ཅིག་གིས་རྩམ་པ་སྟེར་རོགས་ཞེས་སྐད་རྒྱག་སྐབས་མི་ཚང་དེའི་འདོགས་ཁྱི་ཆེན་པོ་ཞིག་ཡོད་པ་དེ་ཤོར་ནས་ཡོང་བ་དང་།  ལྟོ་སློང་བ་དེས་བདེ་ལྕག་འཁྱུག་པོས་བེར་རྒྱུག་འཕྱར་ཏེ་གཞུ་ལ་ཁད་དེར་བུ་མོ་ཞིག་གིས་འདོགས་ཁྱི་བཀག་ནས་རྩམ་པ་སྟེར་བའི་ངང་ཚུལ་དེར་བཀའ་བློན་རག་ཤག་བའི་བཀའ་ལྟར།  སྐྱིད་ཟུར་ལགས་ཀྱིས་རྟ་ཐོག་ནས་མཐོང་མ་ཐག་ཕྱིའི་གནས་ཚུལ་དེར་བལྟས་ནས་བརྩམས་པའི་ཀ་བཤད་སྙན་པོ་ཞིག་རེད་ཅེས་ཤོད་རྒྱུན་འདུག 

 

༣༽

ཀ་པཱ་ལི་ནས་སྤུ་གཅིག་བཏོག །

ཁ་ཡི་ཟུར་དུ་བཙུགས་པ་འདྲ། །

ག་ནས་བལྟས་ཀྱང་འདྲེ་འདྲ་བ། །

ང་ལ་གནོད་པ་མ་སྐྱོལ་ཨང་། །

ཞེས་པ་དེ་ནི་ཏཱ་ལའི་བླ་མ་སྐུ་ཕྲེང་བཅུ་གསུམ་པའི་སྐབས་མགྲོན་ཆེ་བསྟན་པ་དར་རྒྱས༼ མིང་འདོགས་ལ་ཨ་སོབ་ཟེར་བ ༽དབང་གྲགས་གསུམ་ལྡན་པའི་མི་དེའི་ངོ་གདོང་ལ་དམིགས་ནས་འཕྱ་སྨོད་ཀྱི་ཚུལ་དུ་བྲིས་པ་ཞིག་རེད་ཅེས་ཤོད་སྲོལ་འདུག 

 

༤༽ སྔར་རག་ཁ་ཤག་ལ་ས་དབང་ཞིག་བྱུང་བ་དེའི་མདུན་སྐྱིད་ཟུར་ལགས་ཕྱིན་པ་རེད།  ས་དབང་དེ་ནི་བཀའ་བརྒྱུད་པ་ཞིག་ཡིན་ཅིང་།  བཞུགས་སའི་གཟིམ་ཆུང་དེ་ནི་ཐོག་བརྩེགས་ཀྱི་སྦུག་ལ་སྡིངས་ཆ་མཐོན་པོ་བསླངས་ཏེ་སྦུག་སྦུག་མུན་ནག་ཅིག་ཡོད།  ས་དབང་དེ་ནི་བཀའ་མོལ་མང་པོ་རང་མི་གནང་མཁན་ཞིག་རེད།  ས་དབང་དེས།  ཡ།  སྐྱིད་ཟུར་སླེབས་བྱུང་། སྡོད་དང་།  དེ་རིང་ང་ལ་རྩོམ་ཞིག་རྒྱག་དགོས་ཞེས་གསུངས།  སྐྱིད་ཟུར་གྱིས་སྐུ་ངོ་མི་དབང་ཆེན་པོར་བསྟོད་པ་སྟབས་བདེ་ཞིག་འབུལ་བདེ་པོ་རེད་ཟེར་ནས་ཤོ་ལོ་ཀ་ཞིག་བརྩམས་ཏེ།

གཟིམ་ཆུང་སྦུག་སྦུག་མུན་པ་ནག་པོའི་ནང་། །

བཀའ་བློན་སྦུག་སྦུག་རག་ཁ་ཤག་པ་བཞུགས། །

ཞལ་འདོན་སྦུག་སྦུག་བཛྲ་གུ་རུའི་གསུང་། །

ང་ལ་དོན་དག་སྦུག་སྦུག་ཨའུ་ཙམ་ཡོད། །

དེ་ཉིན་སྐྱིད་ཟུར་རག་ཁ་ཤག་གི་སར་སླེབས་དུས་བཀའ་བློན་གྱི་དྲུང་དུ་བླ་མ་རལ་ལྕོག་བརྒྱབ་པ་ཤམ་ཐབས་དཀར་པོ་དང་།  སྒོམ་ཐག་གྱོན་པ་ཞིག་འདུག  བཀའ་བློན་གྱིས་གསུང་དོན།  སྐྱིད་ཟུར་གྱིས་དེ་རིང་ང་ཚོའི་རིན་པོ་ཆེ་ལའང་རྩོམ་ཞིག་རྒྱག་དགོས་གསུངས།  སྐྱིད་ཟུར་གྱིས་ཨ་ཙི་རིན་པོ་ཆེ་ལ་ངས་རྩོམ་བརྒྱབ་ན་འགྲིགས་ཨེ་ཡོང་ཤོད་སྐབས།  བླ་མ་དེས་ཆེ་ཉམས་དང་བཅས་ཏེ་བཤད་པར།  སྙིང་རྗེ་སེམས་ཅན་གྱི་ཁ་ནས་གང་ཡང་ཤོད་སྲིད་ཀྱི་རེད།  ཁྱེད་རང་ང་ལ་རྩོམ་ཞིག་རྒྱོབ་ཤིག་ཅེས་བཤར་པ་ལྟར་སྐྱིད་ཟུར་གྱིས་རྩོམ་བརྒྱབ་པར།

མགོ་ལ་རལ་ལྕོག་ཁྱི་རོ་ཙམ། །

ལས་ངན་མ་དག་རྣམ་སྨིན་རེད། །

སྣམ་བུའི་ཐག་པ་འདོམ་གང་དེ། །

གཏི་མུག་སྒོམ་པའི་སྒོམ་ཐག་རེད། །

ཤམ་ཐབས་དཀར་པོ་ཕར་ཕུད་ནས། །

དམྱལ་བར་འགྲོ་བའི་བདེ་ཆས་སྤྲོད། །

ཅེས་བརྗོད་དེ་རིན་པོ་ཆེ་ཉམས་ཤོར་བ་ཞིག་དང་།  བཀའ་བློན་རག་ཤག་པའང་ཞལ་སྐྱེངས་དགོས་པ་ཞིག་བཟོས་པ་རེད།

 

༥༽ སྐྱིད་ཟུར་ལགས་ཀྱིས་བཤད་སྒྲར་འབྲུ་བུན་ཧ་ཅང་མང་པོ་ཞིག་སྤྲད་དགོས་ཀྱི་ཡོད་སྟབས།  ཉིན་ཞིག་སྐྱིད་ཟུར་གྱིས་འབྲུ་བུན་སྤྲོད་བྱེད་དུ་གླང་དམར་པོ་རྔོ་ནད་ཅན།  ཤ་སྐམ་པོ།  རྙང་རྒྱལ།  མཇུག་མ་སྐམ་པོ་ཞིག་འཁྲིད་དེ་བཤད་སྒྲར་བཅར་ནས་བུན་ཚབ་ཏུ་གླང་དེ་བཞེས་རོགས་གནང་ཞེས་ཞུ་སྐབས།  བཤད་སྒྲའི་བཀའ་བློན་གྱིས་གསུང་དོན།  གླང་དེའི་མདོག་དང་རྣམ་པ་མཚོན་པའི་རྩོམ་ཞིག་བརྒྱབ་ན་གླང་དེ་ལེན་ནས་འབྲུ་བུན་དག་པ་བྱས་ཆོག་ཅེས་གསུངས།  སྐྱིད་ཟུར་གྱིས་དེ་རང་དང་ལེན་ཞུས་ཏེ་གླང་དེར་རྩོམ་བརྒྱབ་པ་སྟེ།  

དཔྲལ་བ་ལྕགས་ལ་རྭ་ཅོ་ཟངས། །

ལྕགས་ཟངས་འདྲེས་མ་བཤད་སྒྲར་བདག །

སྒལ་གཞུང་གྲི་ལ་རྩིབ་མ་ཁྲབ། །

གྲི་ཁྲབ་རང་འགྲིགས་བཤད་སྒྲར་བདག །

མཇུག་མ་གཞུ་ལ་རྙང་མ་མདའ། །

མདའ་གཞུ་རང་འགྲིགས་བཤད་སྒྲར་བདག །

དེ་ནས་སྐྱིད་ཟུར་འབྲུ་བུན་བདག །

ཅེས་བཤད་དེ་གན་རྒྱ་བསུབ་ཐུབ་པ་བྱུང་བ་རེད།

 

༦༽གཟིམ་ཤག་བཤད་སྒྲའི་ངོ་གཡོག་ཚོས་སྐྱིད་ཟུར་ལགས་ལ་མཚམས་རེ་ཕན་ཐོགས་དང་།  མཚམས་རེ་རྩེད་འཇོའི་ཚུལ་དུ་དམའ་འབེབས་བྱེད་ཀྱི་ཡོད་པས།  ཉིན་གཅིག་སྐྱིད་ཟུར་ལགས་གཟིམ་ཤག་ཏུ་ཕེབས་པའི་སྐབས་དང་བསྟུན་ཏེ།  སྔོན་ནས་གྲ་སྒྲིག་བྱས་པའི་ཇ་དཀར་ཞབས་ར་ཁྱོན་ནས་མེད་པ་གཅིག་གི་ནང་དུ་གསོལ་ཇ་ལམ་སེང་འཐུང་མི་ཐུབ་པའི་ཚ་པོ་ཞིག་བླུགས་ཏེ་མདུན་དུ་ཅོག་ཙེ་ཡང་བཞག་མེད་པས།  སྐྱིད་ཟུར་ལགས་ལག་པ་འཚིགས་ཏེ་ལག་ནས་དཀར་ཡོལ་ཤོར་དགོས་པ་ཞིག་བཟོ་རྩིས་བྱས་ཀྱང་།  སྐྱིད་ཟུར་ལགས་ནི་དྲན་པ་སྐྱེན་ཞིང་རིག་པ་རྣོ་བ།  རིག་ལམ་ཐོག་ནས་ཡ་ལན་སྤྲོད་དཀའ་བའི་མི་ཞིག་ཡིན་སྟབས་ལམ་སེང་ཐབས་ཤེས་བཏོན་ནས་དེ་འཕྲལ་ལག་གཡས་པས་གཡོན་མར་རམ་འདེགས་བྱེད་མི་དགོས་པར་ལག་གཡོན་མའི་ཕྲེང་བ་ཕུད་ནས་སྒོར་སྒོར་རང་འཇགས་ཞལ་པའི་སྟེང་དུ་བཞག་ནས་དེའི་སྟེང་དུ་ཇ་དཀར་ཚ་པོ་དེ་བཞག་པ་དང་ཆབས་ཅིག  གློ་བསངས་གཅིག་བརྒྱབ་སྟེ་བསྡད་སྐྱོར་ཞིག་བྱས་ནས་ལོའོ་ཞེས་པའི་སྒྲ་དང་བཅས་ཇུས་ལན་ཇུས་ཀྱིས་བསློགས་ཏེ་ཁོ་པ་ཚོ་ཅི་བྱེད་འདི་བྱེད་མེད་པ་ཞིག་བཟོས་པའི་ཤོད་རྒྱུན་འདུག 

 

༧༽

གུར་དཀར་པོ་ཉི་མ་བརྒྱ་ཤར་ནང་། །

མི་སེར་པོ་རྙང་མའི་མདོག་འདྲ་བཞི། །

དཀར་ལ་དམར་མདངས་ཆེ་བ། །

སྐྱིད་ཟུར་ལགས་ཀྱི་བཞིན་རས། །

དེ་ལས་དམར་ཙམ་བྱུང་ན། །

སྤྲེའུ་ལགས་ཀྱི་རྐུབ་རེད། །

ཅེས་པ་འདི་ནི་གྲྭ་བཞི་རྩིས་བཤེར་གྱི་དུས་སུ་བཀའ་བློན་རྣམ་པ་བཞུགས་སའི་དབུ་གུར་དཀར་པོ་དེ་ལོ་མང་སྐུལ་ཟད་ཀྱིས་རྐྱེན་པས་བཙད་ནས།  ཨི་ཁུང་མང་པོ་ཡོད་སྟབས་ཉི་མ་ཤར་སྐབས་གུར་ནང་ཉི་འོད་བརྒྱ་ཕྲག་འཕྲོ་བའི་ཚུལ་དེར་བྲིས་པ་ཞིག་དང་།  གཉིས་པ། བཀའ་བློན་བཞི་པོའི་བཞིན་རས་ནི་རྙང་མའི་མདོག་དང་འདྲ་བ་ལ་དཔེ་བཀབ་ནས་འཕྱ་སྨོད་ཤུགས་ཆེན་བྱས་པ་ཞིག་ཡིན་པ།  གསུམ་པ། རང་གིས་རང་ལ་དཀར་དམར་མདངས་ལྡན་གྱི་བཞིན་རས་ཞེས་འུད་བསྟོད་བྱས་པ་ཞིག་ཡིན་པ།  བཞི་པ། སྐབས་དེ་དང་བསྟུན་ནས་གོང་དུ་བཀའ་བློན་རྣམ་པར་འཕྱ་སྨོད་བྱས་པ་དེར་ཁ་སྐྱེངས་ལྟ་བུའི་རང་ཉིད་ཀྱི་བཞིན་རས་དེ་ལྟ་སྣང་མི་མཛེས་པའི་སྤྲེའུའི་རྐུབ་ལ་དཔེ་བཞག་ནས་བཞད་གད་ཀྱི་ཚུལ་དུ་བརྗོད་པ་ཞིག་ཡིན་པའི་ཤོད་རྒྱུན་འདུག

 

༨༽

ཆུང་དུས་འོ་མའི་གསོས་དྲིན་མེད་པ་ལ། །

འཆི་ཁར་ཐུག་པའི་སྐྱོ་མས་ག་ལ་ཕན། །

བེའུ་མི་སྡོད་བེའུ་བཏང་ནས་འགྲོ། །

བེའུ་ཁོག་མའི་ནང་དུ་བཏང་ནས་འགྲོ། །

དེ་ནི་བེའུར་དཔེ་བཀབ་ནས་འཕྱ་སྨོད་ཀྱིས་ཚུལ་དུ་བྲིས་པས་ཚིག་དེས་མི་དང་། མིའི་དབར་གྱི་འཚོ་བའི་བརྒྱུད་རིམ་གྱི་འབྲེལ་བའི་ནང་བསམ་གཞིགས་ནན་ཏན་བྱེད་དགོས་པའི་རྒྱུ་མཚན་ཤུགས་ཀྱིས་བསྟན་འདུག

 

༩༽

ཀ་ལ་ཀ་ཏའི་ཡུལ་ནས་ཉེར་ལྷགས་པའི། །

ཁ་འཇམ་གཏིང་ནག་ཨ་སེར་དྲེན་པོ་ཁོས། །

ག་ལེར་བྱི་ལའི་གོམ་འགྲོས་དོར་བཞིན་དུ། །

ང་ཅག་གངས་ཅན་ལྗོངས་ཀྱི་དཔལ་ལ་འཚེ། །

ཞེས་པ་དེ་ནི་སྐྱིད་ཟུར་ལགས་བཤད་སྒྲ་བློན་ཆེན་སར་བཅར་སྐབས།  དབྱིན་ཇི་བཙན་འཛུལ་པའི་རང་གཤིས་ལ་དམིགས་ནས་གངས་ལྗོངས་ཆོས་སྲིད་གཉིས་ལྡན་གྱི་དཔལ་ཡོན་ལ་གནོད་འཚེ་ཞི་སླད།  རང་སྲུང་གཟབ་ནན་གནང་རྒྱུར་སྐུལ་ལྕག་གི་ཆེད་དུ་བྲིས་པ་ཞིག་རེད་སྙམ།

 

༡༠༽

ཆར་པ་བབ་ན་རི་ཀླུང་སྣུམ། །

དགེ་རྩ་བྱས་ན་བར་དོ་ཡང་། །

དེ་ནི་སྤྱི་ལོ ༡༧༠༠ ཡི་ནང་རྒྱ་ནག་གོང་མས་བོད་ལྗོངས་སུ་དྲི་བ་གཉིས་བཏོན་ནས་སྣུམ་ཤོས་དང་།  ཡང་ཤོས་གང་ཡིན་ནམ་ཞེས་པའི་དོན་དེ་མི་ཧ་ཅང་མང་པོ་ཞིག་ལ་སྐད་ཆ་དྲིས་ཀྱང་སུ་ཞིག་གིས་ཀྱང་ལན་གནད་འཁེལ་པོ་ཞིག་བརྒྱབ་མ་ཐུབ་སྟབས།  སྲིད་གཞུང་ནས་སྐྱིད་ཟུར་ལགས་རྩད་གཅོད་ཀྱིས་བཀའ་འདྲི་གནང་སྐབས་སྐྱིད་ཟུར་ལགས་ཀྱིས་གོང་གསལ་གྱི་ལན་དེ་བརྒྱབ་པ་རེད་ཅེས་ཤོད་སྲོལ་འདུག

 

༡༡༽

ཨེ་ལྷ་རྒྱ་རེ་དབུ་འཕང་དགུང་ལས་མཐོ། །

སྒམ་གསེར་སྒམ་ནང་ནས་གཡུ་འབྲུག་ལྡིར། །

ཆིབས་རག་པའི་སྒལ་པ་གྲི་ལས་རྣོ། །

གཉེར་ཕྱག་མཛོད་ལག་པ་རྡོ་ལས་མཁྲེགས། །

གོང་གསལ་ཚིག་རྐང་དང་པོས་ཨེ་ལྷ་རྒྱ་རིར་མཛེས་རྒྱན་སྤྲས་པ་དང་།  ཚིག་རྐང་གཉིས་པས་གསེར་སྒམ་གཟི་བརྗིད་ཁོག་སྟོང་པར་འཕྱ་སྨོད།  ཚིག་རྐང་གསུམ་པས་ཆིབས་རྟ་རག་པ་རུས་གཟུགས་ཡིན་པར་འཕྱ་སྨོད།  ཚིག་རྐང་བཞི་པས་གཉེར་ཕྱག་ཡན་ཆད་འཇུངས་ཅན་ལག་པ་བཀྲེན་པ་བཅས་ཀྱི་དམའ་འབེབས་ཀྱི་ཚིགས་བཅད་འདིས་ལྷ་རྒྱ་རི་ཉམས་རྒུད་ཕྱིན་པ་མཚོན་པ་རེད།

 

༡༢༽

ཀ་ལིའི་ནང་དུ་ཀླད་པ་མེད་པ་ལ། །

ཁ་ཡི་ནང་ལ་ལྕེ་ཞིག་གང་ནས་ཡོང་། །

ག་ཐེར་མིག་གི་དབང་པོ་མ་ཚང་བས། །

ང་ཡི་འཁྲིས་སུ་ཡང་ཡང་མ་ཡོང་ཨང་། །

དེ་ནི་སྐྱིད་ཟུར་ལགས་ལྷ་རྒྱ་རིར་ཡང་ཡང་བཅར་སྟབས་གཉེར་ཕྱག་མཛོད་ཀྱིས་མ་འདོད་པའི་ཚུལ་གྱིས།  ལུག་མགོ་གཅིག་ལྟོ་ཐེངས་གཉིས་བཏང་རྐྱེན་དེར་ཡིད་མ་རངས་པས།  ཀ་ལིའི་ནང་དུ་ཀླད་པ་མེད་པ་ཞེས་པའི་ཚིགས་དེའི་ཐོག་ནས་དེ་ལས་ཞིམ་པའི་ལྕེ་དང་།  མིག་རིལ།  འགྲམ་ཤ་བཅས་བཟས་ཟིན་པ་དེ་བས་ཀྱང་ཤུགས་ཀྱིས་གོ་ཐུབ་པ་ཟུར་བལྟས་ལེབ་མཐོང་གིས་འཕྱ་སྨོད་ཀྱི་ཚུལ་དུ་བྲིས་པའི་ཤོད་རྒྱུན་འདུག

༼རྩོམ་སྒྲིག་ངག་དབང་།༽
ལོགས་སུ་ཉར་བ།  

ནོར་བུ་ག...

西藏人物

མི་སྣའི་...