ཚེ་རབས་ལས་རྩིས་ཀྱི་སྐོར་ཅུང་ཟད་བརྗོད་པ།

ཡོངས་ཁུངས།   བོད་ལྗོངས་འཕྲིན་དྲ། རྩོམ་པོ།  ཤེས་རབ་རྩལ། སྤེལ་དུས།  2017-03-13

དེ་ཡང་བོད་ཀྱི་བཅུ་ཕྲག་རིག་པའི་ཁོངས་སུ་གཏོགས་པའི་གཙུག་ལག་རྩིས་ཀྱི་རིག་པ་ལས་གསུངས་པའི་ཚེ་རབས་ལས་རྩིས་ཀྱི་སྐོར་ཅུང་ཟད་ཞིག་བརྗོད་པ་ལས།  རྩིས་བཞིའི་གང་ཟག་ངོས་བཟུང་བ་དང་།  རྩིས་པའི་དགེ་མཚན་བཤད་པ་དང་།  མ་རྩིས་པའི་སྐྱོན་བཤད་པ།   ཚེ་རྩིས་དངོས་བཤད་པ་བཅས་ས་བཅད་རྣམ་པ་གསུམ་གྱི་ཐོག་ནས་བཤད་པར་བྱའོ།

དང་པོརྩིས་བཞིའི་གང་ཟག་ངོས་བཟུང་བ་ལ།  བཻ་དཀར་ཚེ་རྩིས་ཀྱི་ལེའུ་ལས། །ཚེ་རབས་ལས་རྩིས་རྩི་བ་ནི། །སྐྱེས་ཆེན་འགྲོ་བའི་དོན་ཕེབས་དང་། །དེ་ལས་ལྡོག་པའི་མ་རུང་བ། །མི་ཡི་ཚུལ་དུ་བཟུང་བ་རྣམས། །རྩིས་ཁོག་བྱུང་བའི་ཡུལ་མིན་ཏེ། །ཞེས་པ་ལྟར་དང་པོ་ཚེ་རྩིས་བརྩི་མི་རུང་བའི་གང་ཟག་ལ་གཉིས་ཏེ།  དང་པོ་སྐྱེས་ཆེན་དམ་པ་རྣམས་ནི་སྔོན་ལས་ཀྱིས་སྐྱེ་བ་བཞེས་པ་མ་ཡིན་པར་བསྟན་དང་འགྲོ་བའི་དོན་དུ་ཐ་མལ་བའི་ཚུལ་བཟུང་སྟེ་བྱོན་པའི་བླ་སྤྲུལ་སྐྱེས་ཆེན་དམ་པ་རྣམས་ནི་རྣམ་རྟོག་གི་འཆིང་རྒྱ་ལས་གྲོལ་བས་འདི་དག་ནི་རྩིས་གཞིའི་ཡུལ་ལས་འདས་པ་ཡིན་ནོ།  གཉིས་པ་ནི་དེ་ལས་ལྡོག་པ་སྨོན་ལམ་ལོག་པའི་དབང་གིས་འབྲས་བུ་སྨིན་པ་ནི་འགྲོ་བ་སེམས་ཅན་རྣམས་ལ་གནོད་ཅིང་འཚེ་བའི་ཆེད་བསམ་བཞིན་སྐྱེ་བ་བླངས་ནས།  སྐྱེ་བ་སྔ་ཕྱི་དང་ལས་རྒྱུ་འབྲས་སོགས་མི་བརྩི་བར་རྒྱུན་དུ་གཞན་ལ་གནོད་འཚེ་ཁོ་ན་བྱེད་མཁན་གྱི་གང་ཟག་དག་ཀྱང་རྩིས་གཞིའི་ཡུལ་མིན་ནོ།

གཉིས་པ་བརྩི་རུང་བའི་གང་ཟག་ནི།  བསམ་བཞིན་སྐྱེ་བ་བླངས་པ་མ་ཡིན་པར་ལས་དབང་གིས་སྐྱེ་བ་བླངས་པའི་རང་ཅག་སོ་སོའི་སྐྱེ་བོ་ཐ་མལ་བ་རྣམས་ངེས་པར་དུ་བརྩི་དགོས་པ་ཡིན།  ཇི་ལྟར་ཞེ་ནས་རང་ཅག་རྣམས་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་ཡིན་པས་བདེ་བ་དགོས་ན་ཐབས་སྡུག་བསྔལ་གྱི་རྒྱུ་སྤོང་བ་དང་ལམ་རྐྱེན་ངན་བར་ཆད་ལས་གཡོལ་ཐབས་བྱེད་དགོས་པ་ཡིན།

གསུམ་པ་ཚེ་རྩིས་མ་རྩིས་པའི་སྐྱོན་བཤད་པ།  ཚེ་རྩིས་མ་བརྩིས་ན་གཟའ་སྐར་གདུག་པ་ཅན་དག་གི་ནུས་པས་ལུས་ལ་ན་ཚ་དང་ཚེ་ལ་བར་གཅོད་སོགས་རྐྱེན་ངན་དུ་མ་ཡོང་གི་ཡོད།  དེ་ཡང་གཞི་ཚེ་རབས་དུ་མ་ནས་བསགས་པའི་ལས་དགེ་མི་དགེའི་འབྲས་བུ་རང་དང་ལྷན་ཅིག་ཏུ་ཡོད་བཞིན་པའི་ཐོག  འཕྲལ་རྐྱེན་གཟའ་སྐར་གདུག་པ་ཅན་དང་འཕྲད་དུས་མི་དགེ་བའི་རྒྱུ་ལ་མཐུན་པའི་རྐྱེན་འཕྲད་དེ་ལུས་ཅན་དག་ལ་མི་འདོད་པའི་རྐྱེན་ངན་སྣ་ཚོགས་ཡོང་གི་ཡོད།

བཞི་པ་དངོས་གཞིའི་ཚེ་རབས་ལས་རྩིས་ནི།  རང་ཉིད་མ་ལས་བཙས་པ་ནས་བཟུང་ནམ་འཚོའི་བར་བདེ་བ་དང་སྡུག་བསྔལ་ཇི་ཡོང་།  བྱ་བ་ལམ་འགྲོ་འབྱུང་མིན།  ལུས་སྲོག་བདེ་མིན།  ཕ་སྤུན་ཉེ་འཁོར་ལ་བདེ་དོགས་ཇི་ཡོང་།  ཁྱིམ་གྱི་འབྱོར་གུད་སོགས་མ་འོངས་ལུང་སྟོན་བྱེད་པ་ཡིན།  དེ་ཡང་སྐར་རྩིས་ཞེས་གཟའ་སྐར་དུས་ཚིགས་སོགས་བརྩི་ཚུལ་དང་།  ནག་རྩིས་སམ་འབྱུང་རྩིས་ཞེས་པ་ཤིང་མེ་ས་ལྕགས་ཆུ་སྟེ་འབྱུང་བའི་ཁམས་ལ་བརྟེན་ནས་ལོ་ཟླ་ཞག་དུས་དང༌།  སྲོག་ལུས་དབང་ཐང་ཀླུང་རྟ་སོགས་བརྩི་ལུགས།  དབྱངས་འཆར་བཅས་གསུམ་གྱི་ཐོག་ནས་བརྩི་བ་ཡིན་པས་དུས་འཁོར་སྐར་རྩིས་ལས་གསུངས་པ་ནི་གཟའ་དང་།  ཚེས།  སྐར་མ།  རྟེན་འབྲེལ།  སྦྱོར་བ་སོགས་ཀྱི་འབྲས་བུ་དང་།  གཟའ་རང་རང་གི་ཁམས་དང་ཡི་གེ་བདག་སྐར་བཅས་ལ་སྦྱར་ནས་སྐྱེས་བུའི་བདེ་སྡུག་བརྟག་པ་ཡིན།  དབྱངས་འཆར་རྒྱུད་ལས་བསྟན་པའི་བརྩི་ཚུལ་ནི་ཀུན་གཟིགས་དབྱངས་འཆར་ཆེན་མོ་ལས།  སྐྱེས་དུས་སྐར་སོགས་ལེགས་བརྟག་སྟེ། །ནམ་ལངས་པ་ནས་བཙས་བར་གྱི། །འདས་པའི་ཆུ་ཚོད་གང་ཡོད་པ། །ཞེས་སོགས་བརྩི་བྱའི་སྐྱེས་བུ་དེ་ཐོག་མར་མ་ལས་བཙས་པའི་སྐབས་ཀྱི་ལོ་དང་།  ཟླ་བ།  ཞག་སོགས་འཕྱུག་མེད་ཐོག་འདས་དབྱུག་ནས་སྐྱེས་སྐར་སྒྲུབ་རྗེས་དབུགས་བར་བསིལ་དགོས།  དེའི་རྒྱུ་མཚན་ནི་ཉིན་ཞག་ཕྲུགས་གཅིག་ལ་སྐྱེས་བུ་དར་མ་ནད་མེད་དལ་བྲེལ་སྙོམས་པ་ཞིག་གིས་དབུགས་འབྱུང་འཇུག་གནས་གཅིག་ཏུ་བརྩིས་པའི་གྲངས་ཉིས་ཁྲི་ཆིག་སྟོང་དྲུག་བརྒྱ་རྒྱུ་བ་ཡིན།  དེ་ལྟར་དབུགས་འབྱུང་འཇུག་གནས་གསུམ་གཅིག་ཏུ་བརྩིས་པའི་གྲངས་དྲུག་ལ་ཆུ་སྲང་གཅིག་དང་།  ཆུ་སྲང་དྲུག་ཅུར་ཆུ་ཚོད་གཅིག་ཆུ་ཚོད་དྲུག་ཅུར་ཉིན་ཞག་གཅིག་ཡིན།  དེ་འདྲའི་དབུགས་སུམ་ཅུ་སོ་གཉིས་དང་ཕྱེད་ཀའི་མཚམས་ཡེ་ཤེས་ཀྱི་དབུགས་རེ་རྒྱུ་བ་ཡིན།  དེར་བརྟེན་བརྩི་བྱའི་སྐྱེས་བུ་དེ་མ་ལས་བཙས་པ་ནས་ཇི་སྲིད་ཚེའི་འཕེན་པ་མ་རྫོགས་བར་དབུགས་གྲངས་ཇི་ཙམ་གཏོང་རྒྱུ་ཡོད་མེད་བརྩིས་ཏེ་དབུགས་དེ་ལས་དུས་དང་ཞག་ཟླ་བ་ལོ་བཅས་སུ་སྒྲིལ་ཏེ་མཐར་ཚེ་ཚད་འགྲུབ་པ་ཡིན།  ཚེ་ཚད་བཟོ་ཚུལ་ལ་བཞེད་པ་མི་འདྲ་བ་སྣ་ཚོགས་ཡོད་ཀྱང་རང་ལུགས་ལ་ཚེ་ལོ་བརྒྱ་པའི་དུས་ཞེས་པར་གཞི་བྱས་ནས་བརྩི་བཞིན་ཡོད།

འབྱུང་རྩིས་ཀྱི་གཞུང་ནས་བསྟན་པའི་ཚེ་རྩིས་ནི་རང་ཅག་རྣམས་དང་པོ་མའི་མངལ་དུ་ཆགས་པའི་ཚེ་འབྱུང་བ་ལྔའི་བྱེད་ལས་ལ་བརྟེན་ནས་གྲུབ་པ་དང་།  བར་དུ་བདེ་མི་བདེ་སྣ་ཚོགས་འབྱུང་བའང་འབྱུང་བ་དེ་དག་འཁྲུགས་མ་འཁྲུགས་དང་མཐུན་མི་མཐུན་སོགས་ལ་བརྟེན་པ།  མཐར་འཆི་བའང་འབྱུང་བ་རྣམས་གཅིག་ནུས་གཅིག་ལ་བསྡུས་པ་བཅས་ཐམས་ཅད་འབྱུང་བས་བྱེད་པར་བརྟེན་བཻཌཱུརྱ་དཀར་པོ་ལས།  ལྕགས་ཆུ་མེ་ས་ཤིང་ལྔ་པོ། །གཅོད་བརླན་དྲོད་སྲ་གཡོ་བ་ཡི། །མཚན་ཉིད་ལྡན་པ་འདི་དག་གིས། །མ་འཁྲུགས་ལས་རྣམས་བདེ་བྱེད་ཅིང་། །འཁྲུགས་ན་ན་འཆིའི་སྡུག་སོགས་འབྱུང་། །དེ་ཕྱིར་རྩིས་འདི་གཅེས་པར་ཟུངས། །ཞེས་གསུངས་པ་ལྟར་བརྩི་བྱའི་སྐྱེས་བུ་དེའི་སྐྱེས་ལོ་དང་སྐྱེས་ཟླ་སྐྱེས་ཚེས།  སྐྱེས་དུས་བཅས་ཀྱི་ལོ་རྟགས་གང་ཡིན་ངོས་འཛིན་པ་དང་།  དེ་དག་གི་སྲོག་ལུས་དབང་ཀླུང་བཅས་ཀྱི་འབྱུང་ཁམས་དང་།  སྤར་ཁ།  སྨེ་བ་སོགས་ཀྱི་འབྱུང་ཁམས་ཕན་ཚུན་མ་བུ་དགྲ་གྲོགས་བསྐོར་ཏེ་སྐྱེས་བུ་དེའི་མི་ཚེ་གཅིག་གི་བདེ་སྡུག་བརྟག་ནས་རྐྱེན་ངན་བར་ཆད་ཡོད་རིགས་སྐབས་སོ་སོར་བསྟན་པའི་རིམ་གྲོའི་རིགས་རྣམས་ཚུལ་བཞིན་བསྒྲུབ་ཚེ་ངན་ཀེག་རྣམས་ཞི་ནས་ཚེ་བསྲིངས་བརྙེད་པར་འགྱུར་རོ། །

གཉིས་པ་ཚེ་རྩིས་རྩིས་པའི་དགེ་མཚན་ནི།  གོང་གི་ངན་དོགས་དེ་དག་ལ་ཚེ་རྩིས་ནས་བསྟན་པའི་རྐྱེན་སེལ་རིམ་གྲོ་དང་།  ཐབས་གཏོ་བཅོས་བྱས་ན་སྔོན་ལས་ཀྱིས་རྣམ་པར་སྨིན་པ་ཐོག་ཏུ་བབས་ཟིན་ན་མ་གཏོགས་རྐྱེན་ངན་གྱི་བར་ཆད་ལས་བཟློག་ཐུབ་པ་ཐེ་ཚོམ་མེད།  དེར་བརྟེན་རྩིས་རིག་གི་ལམ་ནས་ཚེ་གང་གི་བར་ཆད་ངན་པ་དག་བཟློག་པར་བྱས་ནས་ཚེ་འདིར་བར་ཆད་མེད་པར་བདེ་བའི་ངང་གནས་ཐུབ་པའི་དགེ་མཚན་ལྡན་པས་སོ།།

༼རྩོམ་སྒྲིག་གསལ་དགའ།༽
ལོགས་སུ་ཉར་བ།  

ནོར་བུ་ག...

西藏人物

མི་སྣའི་...